অখিল গগৈৰ “জয় আই অসম” আৰু “হিন্দু মুছলমান এক হওক” ধ্বনি : অসমৰ সম্প্ৰীতিৰ নতুন দিগন্ত…
অসম, য’ত বৈচিত্ৰ্যৰ মাজত একতাৰ সুৰ বাজি থাকে, তেনে এক ভূখণ্ডত সাম্প্ৰতিক সময়ত অখিল গগৈৰ নেতৃত্বত নামনি অসমৰ সংখ্যালঘু অঞ্চলত “জয় আই অসম” আৰু “হিন্দু মুছলমান এক হওক” ধ্বনি অসমৰ সামাজিক আৰু ৰাজনৈতিক প্ৰেক্ষাপটত এক নতুন আলোচনাৰ বিষয় হৈ পৰিছে। এই ধ্বনিৰ মাজত নিহিত আছে অসমৰ জাতিগত সম্প্ৰীতিৰ এক সুন্দৰ সম্ভাৱনা, য’ত হিন্দু, মুছলমান, খিলঞ্জীয়া আৰু বংগীয় মূলৰ লোকসকলৰ মাজত শান্তি আৰু ঐক্যৰ নতুন সেতু নিৰ্মাণ হব পাৰে । অৱশ্যে এই ধ্বনিৰ পিছফালে থকা উদ্দেশ্য, ইয়াৰ সামাজিক প্ৰভাৱ আৰু অসমৰ ভৱিষ্যতৰ বাবে ইয়াৰ তাৎপৰ্য কি ইয়াক বুজি উঠাটো বৰ্তমান অতিকৈ জৰুৰী হৈ পৰিছে । যাৰ ফলস্বৰূপে বৰ্তমান এই ধ্বনি সম্পৰ্কে বিতং আলোচনা প্ৰাসংগিক হৈ পৰিছে ।
অখিল গগৈ, ৰাইজৰ দলৰ প্ৰতিষ্ঠাপক আৰু অসমৰ ৰাজনীতিত এক স্পষ্টবাদী নেতা হিচাপে পৰিচিত। তেওঁৰ নেতৃত্বত অসমৰ সংখ্যালঘু অঞ্চলসমূহত “জয় আই অসম” আৰু “হিন্দু মুছলমান এক হওক”ৰ ধ্বনিৰ জোৱাৰ উঠিছে। এই ধ্বনিৰ মূলতে আছে অসমৰ জাতিগত বৈচিত্ৰ্যৰ মাজত ঐক্যৰ বাৰ্তা। অসমৰ ইতিহাসত জাতিগত আৰু ধৰ্মীয় বিভাজনৰ কিছুমান দুৰ্ভাগ্যজনক ঘটনাৰ পিছত এনে বাৰ্তাৰ প্ৰাসংগিকতা আৰু গুৰুত্ব অপৰিসীম। বিশেষকৈ বংগ মূলৰ মুছলমান জনগোষ্ঠীৰ মাজত এই ধ্বনিৰ জনপ্ৰিয়তাই এক নতুন সম্ভাৱনাৰ দুৱাৰ মুকলি কৰিছে। অসমৰ সামাজিক গাঁথনিত হিন্দু আৰু বংগমূলীয় মুছলমানৰ মাজৰ সম্পৰ্ক সদায়েই জটিল হৈ আছে । ঐতিহাসিকভাৱে অসমত বংগ মূলৰ মুছলমানসকলক প্ৰায়ে “বাংলাদেশী মিয়া” বুলি চিহ্নিত কৰা হয়, যাৰ ফলত অসমৰ মূল সুতিৰ মানুহ আৰু এই জনগোষ্ঠীৰ মাজত অবিশ্বাসৰ ভাৱ সদায় অব্যাহত হৈ আছে । এনে পৰিস্থিতিত বৰ্তমান অখিল গগৈৰ এই ধ্বনিৰ মাজেৰে তেওঁ এই বিভাজনৰ শাৰী ভাঙি এক সাংস্কৃতিক আৰু জাতিগত ঐক্যৰ বাৰ্তা প্ৰচাৰ কৰাৰ সম্ভাৱনাক নুই কৰিব নোৱাৰি । মুলতঃ অখিল গগৈৰ এই ধ্বনিৰ ইতিবাচক সম্ভাৱনা অসমৰ সমাজৰ বাবে এক নতুন দিগন্তৰ সূচনা কৰিব পাৰে। “জয় আই অসম” ধ্বনিয়ে অসমীয়া জাতীয়তাবাদৰ এক নতুন ৰূপ প্ৰকাশ কৰিছে, য’ত অসমৰ সকলো জনগোষ্ঠীৰ সমান অংশগ্ৰহণৰ ওপৰত গুৰুত্ব দিয়া হৈছে। এই ধ্বনিয়ে বংগ মূলৰ মুছলমান জনগোষ্ঠীক অসমীয়া সমাজৰ মূল সুঁতিৰ সৈতে জড়িত কৰাৰ এক সুন্দৰ প্ৰয়াস হব পাৰে । যদি এই জনগোষ্ঠীয়ে সচা অৰ্থত অসমৰ প্ৰতি আনুগত্য প্ৰকাশ কৰি এই ধ্বনিৰ সৈতে নিজকে সম্পৃক্ত কৰে, তেন্তে ই অসমৰ জাতিগত সম্প্ৰীতিৰ এক উজ্জ্বল দৃষ্টান্ত হ’ব। আনহাতে “হিন্দু মুছলমান এক হওক” ধ্বনিয়ে অসমৰ ধৰ্মীয় বিভাজনৰ শাৰী ভাঙি শান্তিৰ এক নতুন পৰিৱেশ গঢ়ি তুলিব পাৰে। অসমত ধৰ্মীয় সংঘাতৰ কিছুমান ঘটনাৰ পিছত এনে বাৰ্তাৰ প্ৰয়োজনীয়তা অনস্বীকাৰ্য। যদি অখিল গগৈৰ এই ধ্বনি নিৰ্বাচনী স্বাৰ্থৰ সলনি সচা অৰ্থত সম্প্ৰীতিৰ ৰাজনীতিৰ এক অংশ হৈ উঠে, তেন্তে ই অসমৰ সমাজত দীৰ্ঘম্যাদী শান্তি আৰু স্থিৰতা আনিব পাৰে। দেখা গৈছে যে এই ধ্বনিৰ জৰিয়তে অসমৰ সংখ্যালঘু জনগোষ্ঠীৰ মাজত ৰাজনৈতিক সচেতনতা বৃদ্ধি পাইছে। বংগ মূলৰ মুছলমান জনগোষ্ঠীৰ মাজত অখিল গগৈৰ জনপ্ৰিয়তাই এই জনগোষ্ঠীক অসমৰ মূল ৰাজনৈতিক প্ৰক্ৰিয়াৰ সৈতে জড়িত কৰাৰ এক সুযোগ সৃষ্টি কৰিছে । ইয়াৰ ফলত তেওঁলোকৰ অধিকাৰ আৰু স্বাৰ্থৰ প্ৰতি জনমত দিয়াৰ সম্ভাৱনা বৃদ্ধি পাইছে।
লক্ষণীয় যে যদিও অখিল গগৈৰ এই ধ্বনিৰ ইতিবাচক সম্ভাৱনা অপৰিসীম, কিন্তু ইয়াৰ সৈতে জড়িত কিছুমান প্ৰত্যাহ্বানো আছে। বৰ্তমান এই ধ্বনিৰ আঁৰৰ উদ্দেশ্যৰ বিষয়ে মূল সুতিৰ অসমীয়া মানুহৰ সন্দেহৰ সৃষ্টিওঁ হ’ব পাৰে। কিয়নো ৰাজনীতিত প্ৰায়ে দেখা যায় যে নিৰ্বাচনী জয়ৰ স্বাৰ্থত জনপ্ৰিয় ধ্বনিৰ সৃষ্টি কৰা হয়। যদি অখিল গগৈৰ এই ধ্বনি কেৱল ভোটৰ ৰাজনীতিৰ এক অংশ হৈ পৰে, তেন্তে ইয়াৰ সামাজিক প্ৰভাৱ হ্ৰাস পাব আৰু সমাজত অবিশ্বাসৰ ধুসৰ বাতাবৰন সৃষ্টি হ’ব । সততে দেখা যায় যে অসমৰ খিলঞ্জীয়া লোকে বংগ মূলৰ মুছলমান জনগোষ্ঠীক অবিশ্বাসৰ দৃষ্টিৰে চায় । যাৰ ফলত বৰ্তমান “জয় আই অসম” ধ্বনিৰ জৰিয়তে বংগ মূলৰ মুছলমান জনগোষ্ঠীক অসমীয়া সমাজৰ মূল সুঁতিৰ সৈতে জড়িত কৰাৰ প্ৰয়াসক কিছুমানে সন্দেহৰ চকুৰে চোৱাতো তেনেই অস্বাভাৱিক কথা নহব । এনে পৰিস্থিতিত সম্প্ৰীতিৰ বাৰ্তা প্ৰচাৰৰ সমান্তৰালভাৱে সকলো জনগোষ্ঠীৰ মাজত অখিল গগৈ'ৰ পাৰস্পৰিক বিশ্বাস গঢ়ি তোলাটো আাটাইতকৈ ডাঙৰ প্ৰত্যাহবান হব ।
মুলতঃ কব পাৰি “জয় আই অসম” আৰু “হিন্দু মুছলমান এক হওক”ৰ ধ্বনিৰ পটভূমিত অসমৰ সমাজৰ বাবে এক নতুন সম্ভাৱনাৰ দুৱাৰ মুকলি হৈছে। এই ধ্বনিৰ মাজত লুকাই আছে অসমৰ জাতিগত আৰু ধৰ্মীয় বৈচিত্ৰ্যৰ মাজত ঐক্যৰ এক সুন্দৰ সপোন। যদি অখিল গগৈৰ নেতৃত্বত এই ধ্বনি নিৰ্বাচনী স্বাৰ্থৰ বাহিৰলৈ গৈ সচা অৰ্থত সম্প্ৰীতিৰ ৰাজনীতিৰ এক অংশ হৈ উঠে, তেন্তে অসমৰ সমাজত দীৰ্ঘম্যাদী শান্তি আৰু স্থিৰতাৰ এক নতুন অধ্যায় আৰম্ভ হ’ব। কিন্তু এই সপোন বাস্তৱায়িত কৰিবলৈ হ’লে সকলো জনগোষ্ঠীৰ মাজত পাৰস্পৰিক বিশ্বাস, সহযোগিতা আৰু সাংস্কৃতিক বুজাবুজিৰ পৰিৱেশ গঢ়ি তোলাটো অত্যন্ত জৰুৰী হব । অসমৰ ভৱিষ্যত এই ধ্বনিৰ সফলতাৰ ওপৰত নিৰ্ভৰ কৰিব, এই ধ্বনি যদি সফল হয় তেন্তে ই কেৱল এক ৰাজনৈতিক ধ্বনিয়ে নহয়, বৰঞ্চ অসমৰ সমাজৰ একতাৰ প্ৰতীক হৈ পৰিব ।
- বিজয় পাংগিং, দিচাংমুখ, শিৱসাগৰ
0 Comments